PASAMBAHAN NAGARI SINGGALANG

Angku sambah.
Sungguahpun angku nan disambah,mangko mintak ampunmalah ambo dihadapan angku ka pangulu nan gadang basa batuah,sarato guru sarato kito nan rapek.
Dituanku lah nan duo tigo nan bakadudukan,dipakiah,dipegawaidi malin nan ampek jurai di musajik,dikito nan bakarapatan.
Mudo jo mulia alek sa isi rumah gadang nangko,bakeh ambo manghantarkan sambah.
Indak tabilang ta atok,tajalani.
Hanyolah pambilang paatok panjalani pamuliakan hanyolah sambah.
Sambah ambo nantun sambah baririk di hadapan angku pangulunan gadang basa batuah.
Ujuang panitahan kabakeh angkunan sakaji alek……
(jwb angku alek:manitahlah sutan)…

Sipangka langsung manitah….

Mangko manitah malah ambo…
Rasihan pamenan lalok,
kacimpuang pamenan mandi,
indak tabilang ta atok,
sambah jo simpuah panjalani..

Kanang kanang diateh bukik,
siturak didalam rawah,
sikalumbuak di ateh pintu,
mintak tanang ambo sadikik,
ambo ini mahantarkan sambah,
ayam bakukuak ambo lai ragu.

lalatan nak rang kamang,
rang kabun marapek suri,
kalapo dimano rang lampaikan,
kok salah ambo toloanglah timbang,
kok guru cando lah mati,
nan kitab tabaliak balun,
sasek ambo toloang tunjuakkan.

sikaduduak daunnyo rampak,
rantiangnyo ambiak kasuluah,
bungo cimpago rang sakahkan,
angku duduak ambo pun tagak,
disusun jari nan sapuluah,
mardeso kato disambahkan.

rami galanggang nak rang tiji,
naiak juaro nak rang kajai,
sungguahpun ambo tagak badiri,
bukan toh ambo cadiak pandai…

Kumbuak iyo,puran pun iyo,
pacah carano panimbokan,
angku iyo tuanpun iyo,
sambah dimano ditibokan.

sapandai pandai marambah,
rambahkan ka batang bingku,
bingkudi ateh kalupak,
kalupak babungo pulo,
sapandai pandai manyambah,
sambahkan bakeh pangulu,
pangulu mamakai cupak,
cupak mamakai adaik pusako pulo.

kalakatayo anak kambiang,
malompek kadalam duri,
malosoh kadalam samak,
bamalam dikoto tuo.
bukantoh ambo tagak samiang,
lah manjadi adaik di nagari,
lah bapakai di nan banyak,
baitu pituah di nan tuo..

Hanyolah nan manjadi pituah dinan tuo,
sajak samulo sumua bagali, rantiang bapatah nagari bahuni,pangulu badiri dlm nagari sarato jo adaiknyo.
Adopun duo kato nan baeco nan bapakai, satu kato buek,ganok kaduo kato pusako.
Hinggo buek namonyo bapakai,pusako bana barunggusi,
lampisan buek jo pusako wajah rang jano dikanduangnyo,
suatu wajah elok jo Buruak nan tak habih silang salisih,
nan tak carai hiru haro dlm nagari nan tdk bakaputusan.

Dlm pd nantun,DUO pulo jalan nan baturuik,mano2 jalan nan baturuik,
satu jalan syarak,kaduo jalan adaik.
Jikok dikaji jalan sapanjang syarak, iyo malah:iman,islam,tauhid,makrifatullah,.
Mangko didirikanlah musajik jamiak ditangah nagari tampek mangarajokan rukun nan limo,
itulah nan dikaji jalan sapanjang syarak namonyo.
Jikok dikato jalan sapanjang adaik,
hanyo tu:babarih babalabeh,baukua bajangko,
batiru batuladan,basasok bajarami,
bapandam bapakuburan,bagalanggang baparmedanan,
bajanjang naiak batanggo turun,naiak dari pado janjang turun daripado tanggo..

Kamano jalan kabaliak,
kinari jalan kasumpu,
pulai bapangkek naiak, maninggakan rueh dgn buku,
manusia batanggo turun, maninggakan adaik jo pusako..

HANYOLAH NAN MANJADI ADAIK JO PUSAKO:
kayu kalek madang dilurah,
diambiak katangkai pangkua,
labiahnyo kapapan tundo.
kabek arek nan tidak barubah,
simpai nan tidak baransua,
sakarang kini areknyo baitu juo.

AREKNYO BAITU JUO,
jikalau luhak dibari barajo,nagari dibari bapangulu,kampuang dibari ba nan tuo,
GUNONYO TU,elok luhak saparentah rajo,elok nagari saparentah pangulu,elok kampuang dek nan tuo,rancak tapian dek nan mudo.
baa diateh basa nan babingkah tanah,gadang nan balingkua aua. ketek banamo pakarjaan,gadang banamo pakarjaan,.
Baa di nan sakarang iko kini,krn lah tumbuah pakarjaan baik di koroang kampuang ANGKU……….
Saumpamonyolah angku pangulu nan gadang basa batuah,
saumpamo kayu gadang basilaro ditangah koto,
urek nan taguah kapitalo,pucuak nan cewang ka udaro,
urek manjadi aka baha, batang manjadi batang baru,
kulik manjadi kulik tanga, gatah manjadi gatah piyu,
ranggeh